Gjykata e Posaçme kundër Korrupsionit dhe Krimit të Organizuar ka dhënë vendimin përfundimtar për një nga çështjet e rëndësishme të korrupsionit në sektorin publik, ku ndër të akuzuarit ishte edhe ish-drejtoresha e ARRSH-së, Sonila Qato.
Qato u shpall fajtore për “shkelje të barazisë në tendera publike” dhe u dënua me 6 muaj burg. Megjithatë, gjykata vendosi të pezullojë dënimin, duke e detyruar atë të kryejë 60 orë punë në interes publik brenda 6 muajve dhe të qëndrojë nën mbikëqyrjen e Shërbimit të Provës.
Gjithashtu, ajo nuk mund të mbajë funksione publike për një periudhë 1-vjeçare.
Përveç saj, u dënuan me të njëjtën masë edhe zyrtarët Elona Gogo, Erdit Salillari dhe Simon Prendi. Të gjithë do të kryejnë punë në interes publik dhe humbasin përkohësisht të drejtën për poste publike. Prendi u shpall i pafajshëm për një akuzë tjetër, atë të falsifikimit të dokumenteve.
Nga ana tjetër, gjykata deklaroi të pafajshëm shtatë persona të tjerë, përfshirë Miranda Shkurtin, Nikollaq Mihalin, Admir Pahumin dhe të tjerë, me arsyetimin se mungonte përmbushja e kritereve për vepër penale sipas ligjit.
Ky vendim vjen pas një hetimi të nisur nga SPAK për shkelje në procedurat e prokurimit dhe falsifikim dokumentesh, të kryera në kuadër të projekteve publike dhe tenderëve shtetërorë.
Të gjithë të dënuarit do të përballen gjithashtu me detyrimin për të mbuluar shpenzimet e procesit penal. Vendimi është i apelueshëm brenda 15 ditësh në Gjykatën e Posaçme të Apelit.
