Një tjetër shtet i shtohet grupit të vendeve që kanë dyshime mbi efektivitetin e vaksinave të AstraZeneca. Kësaj radhe ka qenë Gjermania ajo që ka pezulluar miliona doza, duke forcuar edhe njëherë dyshimet për efekte anësore.
Ky vendim u mor nga Ministria e Shëndetësisë, e cila u bëri thirrje autoriteteve që të hetohen rastet e mpiksjes së gjakut, i cili është ndër efektet anësore më të njohura.
AstraZeneca është ndër kompanitë që po furnizon sëfundmi edhe Shqipërinë, por deri më tani kjo vaksinë nuk është pezulluar. Me dozat e siguruara nga kjo kompani është menduar të vijohet procesi i vaksinimit për mësuesit.
Më parë ishte edhe Instituti Paul Ehrlich që kërkoi hetime lidhur me rastet e vdekjes të qytetarëve që kishin marrë vaksinën e AstraZeneca.
Gjithë alarmi për këtë vaksinë, e cila tashmë prej kohësh është në qarkullim në shumë vende të botës përfshi Shqipërinë është ngritur për shkak të disa rasteve që pas marrjes së dozës kanë vdekur për shkak të mpiksjes së gjakut.
Dyshohet se një nga efektet anësore të kësaj vaksine është mpiksja e gjakut, por sipas OBSH nuk ka fakte që ajo vjen tek personat në fjalë prej vaksinës.
Më parë masën e ngjashme si të Gjermanisë e kanë ndërmarrë vende si Danimarka, Irlanda, Norvegjia, Bullgaria apo Islanda.
