Qyteti i Këlnit në Gjermani është përfshirë nga masa të rrepta sigurie, pasi rreth 20.000 banorë po evakuohen nga lagjja Deutz për shkak të zbulimit të tre bombave të Luftës së Dytë Botërore.
Dy prej tyre peshojnë 20 tonë secila dhe një tjetër 10 tonë, të gjitha të pajisura me fitil impakti, çka i bën tepër të rrezikshme për t’u çaktivizuar.
Zona e prekur përfshin pjesë të konsiderueshme të qendrës së qytetit dhe të qytetit të vjetër, përfshirë 58 hotele, institucione arsimore, muze, çerdhe dhe godina shtetërore.
Evakuimi nisi në orën 08:00 të mëngjesit dhe autoritetet kanë paralajmëruar masa shtrënguese për ata që nuk zbatojnë urdhrat, përfshirë largimin me forcë nga policia.
Ndërkohë, infrastruktura e qytetit është paralizuar:
• Janë mbyllur urat Hohenzollern, Deutz dhe Severins mbi lumin Rajna;
• Stacioni hekurudhor Cologne Messe/Deutz ka ndërprerë qarkullimin;
• Deutsche Bahn ka njoftuar vonesa dhe anulime të shumta në linjat kryesore, përfshirë ICE për Berlinin dhe lidhjet me Stuttgartin.
Për banorët e evakuuar janë hapur dy qendra pritjeje në Sallën e Ekspozitave 10.1 dhe në Kolegjin Profesional Humboldtstrasse, ku nuk lejohen kafshët shtëpiake.
Në përgjigje të gjendjes, kompani të mëdha si RTL Deutschland kanë kaluar në punë online, ndërsa transmetimet televizive janë zhvendosur përkohësisht në Berlin.
Çaktivizimi i bombave do të nisë vetëm pasi të ketë përfunduar evakuimi i plotë. Autoritetet nuk kanë dhënë ende një orar të saktë për nisjen e operacionit.
