Kryetari i Grupit Parlamentar të Partisë Demokratike (PD), Gazment Bardhi, ka kërkuar zhvillimin e një mocioni me debat në Kuvendin e Shqipërisë lidhur me gjetjet e fundit të Zyrës së Bashkimit Evropian kundër Mashtrimeve (OLAF) dhe masat që duhen marrë për të siguruar mbrojtjen e interesave financiare të BE-së. Kjo kërkesë vjen pas zbulimit të keqpërdorimit të 33 milionë eurove fonde të BE-së të destinuara për bujqësinë shqiptare dhe rekomandimit të OLAF për bllokimin e paketës së radhës prej 112 milionë eurosh.
Sipas raportit të OLAF, janë identifikuar disa parregullsi serioze gjatë procesit të dhënies dhe zbatimit të granteve, përfshirë kërkesa për pagesa të jashtëligjshme ndaj kompanive konsulente lokale, kontrata të manipuluara dhe çmime të fryra. Bardhi theksoi se Kuvendi duhet të analizojë dhe të ndërmarrë masa për të parandaluar përsëritjen e abuzimeve të tilla që dëmtojnë financat e BE-së dhe pengojnë zhvillimin e bujqësisë në Shqipëri.
Në kërkesën drejtuar Kuvendit, Bardhi propozoi miratimin e një Rezolute që parashikon krijimin e një Komisioni të Posaçëm Parlamentar për të analizuar problemet dhe për të propozuar masa konkrete që do të ndihmojnë në zhbllokimin e fondeve të BE-së. Ai gjithashtu apeloi për një hetim të plotë dhe të shpejtë nga institucionet e drejtësisë për të vënë përpara përgjegjësisë penale ata që kanë shkelur ligjin.
