Kreu i Grupit Parlamentar të PD-së, Gazment Bardhi, ka komentuar vendimin që zëvendëskryeministrja Belinda Balluku është thirrur nga SPAK për t’u paraqitur ditën e hënë, në lidhje me një nga çështjet e korrupsionit që po hetohen nga prokurori Dritan Prençi. Sipas tij, kjo thirrje rrezikon të mos realizohet, pasi Balluku ka planifikuar një udhëtim jashtë vendit, ndërsa kryeministri Edi Rama po ushtron presion për anulimin e fletë-thirrjes.
Në një deklaratë publike, Bardhi ngriti një sërë pyetjesh drejtuar kreut të SPAK, Altin Dumani, duke kërkuar sqarime nëse ka pasur ndërhyrje të drejtpërdrejta nga Rama ndaj prokurorit Prençi për të bllokuar procedurat ndaj Ballukut. Ai kërkoi gjithashtu që ambasada amerikane dhe delegacioni i BE-së të ndjekin nga afër zhvillimet dhe çdo tentativë për të ndikuar në hetimet.
“Belinda Balluku është zyrtarja më e korruptuar e shtetit shqiptar në këto 35 vite. Në çdo aferë, në çdo sektor, janë gjurmët e saj të korrupsionit, nga energjia tek infrastruktura, nga Tuneli i Llogarasë tek Aeroporti i Vlorës,” deklaroi Bardhi, duke shtuar se ndaj saj ekzistojnë dhjetëra dosje në SPAK dhe se njëra prej tyre ka hyrë tashmë në fazën përfundimtare të hetimeve.
Sipas tij, prokurori Prençi është nën presion të fortë jo vetëm nga politika, por edhe nga struktura të caktuara brenda institucionit, media dhe segmente të krimit të organizuar. Deputeti opozitar pyeti nëse Balluku ka sajuar një aktivitet ndërkombëtar në të njëjtën ditë të paraqitjes në SPAK, për të shmangur hetimin dhe për të fituar kohë.
Në fund, Bardhi i kërkoi publikisht partnerëve ndërkombëtarë të garantojnë mbështetjen për prokurorin Prençi dhe për çdo prokuror që refuzon presionet politike. Ai paralajmëroi se çdo ndërhyrje në këtë proces përbën “një kërcënim serioz ndaj integritetit të drejtësisë së re”.
