Bulevardi i Kasharit, është një ndër bulevardët e rinj që Bashkia e Tiranës ka investuar dhe shumë shpejt punimet do të jenë drejt përfundimit.
Bulevardi i Kasharit i ka të gjithë parametrat e të qenit i tillë. Ai do të ketë dy korsi për secilin kah lëvizjeje, korsi biçikletash dhe rrugë për këmbësorët.
“Jemi duke folur për një zonë që ka një dendësi të madhe banorësh. Këtu jetojnë afro 80 mijë banorë, ndaj nuk mund të bëjmë dot një rrugë të ngushtë kur dendësia e banorëve është kaq e lartë. Kështu që u detyruam të projektonim një bulevard me të gjithë elementët e standardet e nevojshme,” – tha Erind Bejko, drejtori i Përgjithshëm në Bashki, në një intervistë dhënë në “TCH.”
“Këtu kemi një tjetër bulevard me përmasa moderne, ku janë të përcaktuara zonat për gjelbërim, trotuaret, korsia e biçikletave dhe itinerari ku do të lëvizin makinat. Jemi në zonën e Kasharit, në rrugën që lidh dy emra shumë të njohur, ‘Migjenin’ kolos të letrave dhe ‘Kadri Roshin’ kolos të skenës, por nuk mbaron këtu. Me këtë bulevard lidhet edhe rruga ‘Tre dëshmorët’, ajo që në gjuhën e përditshme njihet si rruga e Yzberishtit, ku kemi një zgjerim të rrugës dhe rikualifikim të trotuareve,” – theksoi më tej Erind Bejko.
Ndër të tjera, bulevardi i Kasharit që lidhet me “Unazën e re” do të reduktojë trafikun e rënduar që krijohet në zonë.
