Janë rritur shqetësimet në Kosovë pasi kohët e fundit janë konstatuar raste me riinfektim nga koronavirusi. Kanë qenë profesionistët e shëndetit ata që kanë ngirtur alarmin se personat që e kanë kaluar sëmundjen, kanë dalë sërish pozitiv. Bëhet me dije se ka pasur mjekë që janë infektuar për herë të dytë dhe për momentin janë duke marrë trajtimin e nevojshëm në spital.
Mjeku infektolog Ilir Tolaj tha se ekziston mundësi për riinfektim me COVID, por kjo është një dukuri shuë e rrallë në praktikë. Më tej ai shtoi se studimet po tregojnë që imuniteti kundër COVID-19 është i qëndrueshëm dhe zgjat me vite.
Mjekja pulmologe Rukije Mehmeti është shprehur për televizionin public se vetëm në klinikën pulmologjike në Shërbimin Spitalor Klinik Universitar të Kosovës, aktualisht janë dy mjekë, të cilët janë në trajtim nga riinfektimi.
“Shumica e rasteve po e kalojnë më lehtë riinfektimin. Ne në klinikë i kemi dy doktorë që janë riinfektuar për herën e dytë. Janë raste më të rralla, por po paraqiten individë të caktuar. Edhe në klinikën infektive ka raste që janë duke u trajtuar”, është shprehur Mehmeti.
Që nga fillimi i pandemisë në Kosovë janë regjistruar më shumë se 60 mijë raste me virus, ndërsa më shumë se 1500 persona kanë humbur jetën.
