Lideri konservator gjerman, Friedrich Merz, nuk arriti të marrë shumicën e nevojshme të votave në Bundestag për t’u zgjedhur kancelar, duke sjellë një pengesë të papritur për koalicionin e sapoformuar mes CDU/CSU dhe Socialdemokratëve .
Në votimin e së martës, Merz siguroi 310 vota, gjashtë më pak se shumica absolute prej 316 mandatesh, sipas njoftimit të presidentes së parlamentit, Julia Kloeckner.
Pas rezultatit të papritur, seanca parlamentare u ndërpre për t’u dhënë partive kohë për konsultime mbi hapat që do të pasojnë. Bundestagu ka tashmë 14 ditë në dispozicion për të zgjedhur sërish Merzin ose një kandidat tjetër me shumicën e plotë. Një tjetër raund votimi mund të ndodhë brenda kësaj kohe.
Megjithëse CDU/CSU doli fituese në zgjedhjet federale të shkurtit me 28.5% të votave, Merz kishte nevojë për një partner për të krijuar një qeveri shumice. Të hënën, ai arriti marrëveshje koalicioni me SPD-në, e cila regjistroi rezultatin më të ulët në historinë e saj pas Luftës së Dytë Botërore, me vetëm 16.4%.
Në fokusin e marrëveshjes së re qëndrojnë përpjekjet për të forcuar ekonominë dhe për të rindërtuar kapacitetet ushtarake të vendit, në një kohë kur marrëdhëniet transatlantike dhe garancitë e sigurisë janë vënë në pikëpyetje nga Presidenti amerikan Donald Trump.
Merz ka premtuar gjithashtu një politikë më të ashpër ndaj emigracionit të parregullt dhe synon të ndalë rritjen e Alternativës për Gjermaninë (AfD), e cila zuri vendin e dytë në zgjedhje. AfD-ja u klasifikua zyrtarisht si “ekstremiste e krahut të djathtë” nga inteligjenca e brendshme gjermane, një vendim që ka acaruar raportet me administratën Trump dhe ka çuar në veprime ligjore nga ana e partisë.
Pavarësisht mungesës së përvojës në poste ekzekutive qeveritare, Merz, i njohur për sfondin e tij në sektorin privat, është zotuar për një qeverisje të qëndrueshme dhe të parashikueshme. Në deklaratën e tij pas nënshkrimit të marrëveshjes me SPD-në, ai tha:
“Po jetojmë në kohë me ndryshime të thella dhe pasiguri të mëdha. Prandaj, e shohim si një mision historik udhëheqjen e këtij koalicioni drejt suksesit.”/ REL
