Pasditen e 16 majit, tre persona u paraqitën në Spitalin Rajonal të Elbasanit brenda pak orësh. Sipas një komunikate nga Drejtoria Vendore e Policisë së Elbasanit, një grua 61-vjeçare me inicialet S.A. dyshohet se ka konsumuar mbidozë ilaçesh dhe aktualisht është nën kujdesin e mjekëve, ndërsa hetimet po vijojnë për të zbardhur detajet e tjera.
Gjithashtu, një burrë 69-vjeçar, K.SH., banues në Gjinar, u dërgua në spital dhe dyshohet se ka konsumuar pesticide në një gjendje të rënduar psikologjike.
Në të njëjtën pasdite, shtetasi B.T., 27 vjeç, banues në Belsh, kërkoi ndihmë mjekësore në spital pasi dyshohet se ka konsumuar fotoksinë.
Të tre personat janë nën kujdesin intensiv të mjekëve. Policia njofton se për të tre rastet janë ngritur grupe të posaçme hetimore për të zbardhur ngjarjet. Materialet procedurale janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme.
