Samiti online i vendeve anëtare të Bashkimit Europian nuk shkoi ashtu si duhej.
Krerët e shteteve të unionit refuzuan idenë e koronabondit, një instrument financiar ky për të përballuar pasojat e shkaktuara nga koronavirusi në Europë.
Iniciativa për këtë takim ishte e Presidentit të Këshillit Europian, Charles Michel, ku do të dëgjoheshin propozimet e ministrave të financave të eurozonës.
Në takim pritej të tregohej uniteti i bllokut, por në fakt u panë më shumë ndasitë, në lidhje me fondet që do të përdoren për t’i ardhur në ndihmë Italisë me pajisje mjekësore.
Sjellja e përfaqësuesve të Gjermanisë dhe Holandës, të cilët u rreshtuan kundër koronabondit për Italinë, shkaktoi zemërimin e kryeministrit Italian, Giusepe Conte, i cili deklaroi se nuk do të mbështeste konkluzionet e takimit.
Nëpërmjet një zyrtari italian, Conte i dha ultimatum 10 ditë Brukselit, që të gjejë një zgjidhje për financimin e pajisjeve mjekësore.
Italia u mbështet nga Spanja, vend i cili po kalon një situatë dramatike gjithashtu për shkak të koronavirusit, duke shënuar një numër të lartë viktimash.
“Nëse nuk propozojmë tani një plan të fuqishëm dhe efektiv për krizën ekonomike, impakti do të jetë edhe më i fortë, do të zgjasë më shumë dhe do të vë në rrezik projektin europian”, tha kryeministri Spanjoll Pedro Sanchez.
Më tej ai shtoi se BE po bën të njëjtin gabim si gjatë krizës së 2008-ës, e cila prodhoi rritjen e populzimit brenda unionit.
Kujtojmë këtu se Banka Europiane ka në plan të lëvrojë një fond prej 750 miliardë eurosh, që do t’i vijë në ndihmë vendeve të prekura për t’u rimëkëmbur ekonomikisht
