Një kontroll “blic” i policisë ditën e djeshme në qytetin e Elbasanit, ka bërë që 10 persona të shoqërohen në polici e dy të tjerë të arrestohen.
Personat e arrestuar dyshohen se vepronin si grup kriminal në fushën e kontrabandimit të klandestinëve nga vendet e treta. Pas këtij operacioni masiv, mesa duket policia e Elbasanit ende po qëndron për kontrolle të tjera më të imtësishme në këtë qytet.
Dy shtetasit e ndaluar janë M. K., 32 vjeç dhe M. K., 56 vjeç. Kontrolle janë bërë edhe në resortin e Çapjave që ndodhet në qytetin e Elbasanit.
Njoftimi i policisë:
Në vijim të operacionit që nisi dje në Elbasan janë kapur dhe ndaluar shtetasit:
M.K., 32 vjeç, dhe M.K., 56 vjeç të dy banues në Tiranë , për veprën penale ”Ndihmë për kalim të paligjshëm të kufirit, në formën e kontrabandimit të njerëzve”, kryer në bashkëpunim
Më herët gjatë operacionit të ndjekur me metoda speciale të hetimit nga Drejtoria Hetimore Qendrore në Departamentin e Policisë Kriminale në bashkëpunim me Drejtorinë e Policisë Elbasan, nën drejtimin e Prokurorisë së Rrethit Gjyqësor Elbasan janë arrestuar e ndaluar edhe 8 persona, ndërmjet tyre dhe kreu i grupit një shtetas turk.
Këta persona në bashkëpunim me njëri- tjetrin, vepronin si grup kriminal, duke organizuar transportin e shtetasve të huaj nga Kufiri i Gjelbër me shtetin grek në drejtim të Tiranës dhe më pas në drejtim të Malit të Zi.
Vazhdon puna për identifikimin e personave të tjerë të implikuar në këtë aktivitet kriminal.
