Kreu i partisë Agrare Ambientaliste, Agron Duka ndodhet në Gjermani prej 4 ditësh.
Ai pritej të udhëtonte sot drejt Shqipërisë, por fluturimi është anuluar edhe pse ishte bërë check-ini.
Duka tregon se në aeroport janë bllokuar 270 pasagjerë.
Më tej kreu i PAA shton, se kompania ka mbyllur telefonin dhe nuk mund të kontaktojë njeri.
“Kam nja katër ditë këtu. Nuk është problemi se janë anuluar fluturimet. Avioni nisej në 7:25, u bë chek-ini. Po kompania ka anuluar fluturimin. Jam folur dhe me ambasadorin Kuko, i cili u angazhua dhe me rezulton se nuk ka mbyllje të fluturimeve. Por kjo kompania, që është loë cost, edhe pse ishte i mbushur ky avion, ka anuluar fluturimin dhe ka mbyllur dhe telefonat. 270 pasagjerë ndodhen këtu. Ishte linjë direkte për Tiranë. Ishte i planifikuar. Ky ishte një nga aeroportet që udhëtonte. Kjo është çudi. Kjo kompani ka mbyllur telefonin dhe nuk mund të kontaktojë njeri. Ky ngërç e ka krijuar kompania.”, tha Duka për “News24”.
Kujtojmë këtu se në vendin tonë numri i të prekurve nga koronavirusi ka shkuar në 59, ndërsa janë regjistruar edhe dy viktima.
Qeveria shqiptare ka ndërprerë fluturimet me Italinë dhe Britaninë e Madhe, ndërsa janë mbyllur kufijtë tokësorë me fqinjët.
Për të parandaluar përhapjen e koronavirusit, kryeministri Edi Rama ka urdhëruar kufizimin e qarkullimit të makinave dhe këmbësorëve.
