Kristian Koçibelli, avokati i Bledar Duros, mësuesit 41-vjeçar që akuzohet për ngacmim seksual ndaj dy nxënëseve, deklaroi sot se klienti i tij nuk ka kryer vepër penale, por një kundravajtje administrative.
Pas vendimit të Gjykatës për ta lënë në burg 41-vjeçarin, Koçibelli tha se pretendimet e paraqitura nga ana e tij nuk janë marrë parasysh, edhe pse, sipas tij, neni 230 i Kodit të Procedurës Penale parashikon që gjykata të mos caktojë masën e sigurimit arrest në burg për personat që janë alkoolizuar apo nën ndikimin e substancave të tjera, të cilët janë në trajtim rehabilitues.
Kemi paraqitur më shumë se 6 prova, vërtetim të Spitalit të Traumës në Tiranë dhe të Spitalit Korçë për shtrimet e tij në spital dhe programin e mjekes këtu në Korçë, ndërkohë që bashkëshorten e ka infermiere dhe e ndihmon të kurohet. Mendoj se e vetmja shkelje që ka kryer ky shtetas është një kundërvajtje administrative për shkak të komunikimit me nxënësit. Në këto kushte mendoj se duke qenë një kundërvajtje administrative mund të merrej një masë nga Drejtoria e shkollës apo drejtoria Arsimore por kurrsesi komunikimi që mund të ketë çdo person në rrjetet sociale nuk përbën një vepër penale, tha avokati i mësuesit.
Ai theksoi se Bledar Duro ka pranuar se ka qenë i alkoolizuar dhe se gjatë komunikimit ka qenë nën ndikimin e alkoolit, për shkak se vuan nga varësia ndaj tij.
Shtrimi i parë ka qenë në 2014 dhe i fundit në maj të këtij viti. Disa ditë para se të arrestohej ka qenë në komunikim me mjeken e tij dhe vazhdonte kurimin.
Ai shpjegoi se gjatë orarit të shkollës, Bledar Duro nuk konsumonte alkool, por pas shkollës ai konsumonte alkool në mënyrë të tepruar. Sipas tij, provat që ka paraqitur para gjykatës janë të mjaftueshme për të kërkuar një masë më të butë për këtë shtetas.
Bledar Duro është një profesor prej 25 vitesh, ka qenë në disa shkolla dhe në gjithë këto vite ka pasur një respekt të jashtëzakonshëm te nxënësit e tij. Ai ka nxjerrë me qindra e mijëra punime të tij në Korçë. Komunikimi mes tij dhe nxënësve ka qenë me respekt”, u shpreh avokati.
