“Në gjysmën e rasteve, kur shihni ministra ditëve të diela pasdite, që dalin në televizione duke inspektuar, apo të shtunave paradite, dijeni se i kam me fakte. Të paktën 7 prej tyre i kam të skeduar. Janë në udhëtime jashtë shtetit. Janë në udhëtime private. Lënë kaseta për të treguar që janë në punë. Këtë po jua garantoj. Kjo nuk është vetëm arrogancë, kjo nuk është vetëm një lloj shpërfilljeje ndaj atyre që të paguajnë rrogën, ky është një model që po shkatërron dhënien e përgjegjësisë në shoqërinë shqiptare.”- Blendi Fevziu mbrëmë në “Opinion”.
Fevziu dhe kryeministri Rama janë përfshirë në një përplasje publike pas deklaratave të bëra në emisionin “Opinion”, ku Fevziu tha se disponon fakte sipas të cilave të paktën shtatë ministra udhëtojnë jashtë vendit fundjavave për arsye private, ndërsa në televizione transmetohen pamje inspektimesh sikur ata të ishin në punë.
Pas këtyre deklaratave, kryeministri Rama reagoi publikisht duke i quajtur pretendimet të pabazuara dhe jashtë realitetit. Ai theksoi se në regjistrat zyrtarë të udhëtimeve nuk ekziston asnjë provë që mbështet akuzat për shtatë ministra në udhëtime private fundjavave pa leje. Rama sqaroi se edhe në rastet kur ministrat udhëtojnë për arsye personale, kjo bëhet vetëm pas një kërkese formale për leje dhe me miratim përkatës.
Në reagimin e tij, kryeministri ironizoi edhe përdorimin e termit “kaseta”, duke nënvizuar se prej vitesh nuk përdoren më materiale të tilla dhe se pretendimi për inspektime të rreme nuk qëndron. Ai solli gjithashtu në vëmendje udhëtimet personale të vetë Fevziut jashtë vendit, duke i përdorur si shembull për të kundërshtuar akuzat dhe për të theksuar se udhëtimet private janë një e drejtë individuale.
Në një reagim të gjatë, Rama shkroi se “e vetmja arsye” që i gjen kësaj çështjeje janë udhëtimet e fundit të Fevziut në Amerikën Latine, duke përshkruar me nota ironike itineraret e gazetarit dhe duke i cilësuar deklaratat për “7 ministrat” si lajthitje pa bazë faktike, por me elementë humoristikë. Në fund, ai u shpreh i gatshëm për debat publik, nëse tema do të trajtohet seriozisht.
Pas reagimit të kryeministrit, Blendi Fevziu iu përgjigj sërish me ironi, duke u ndalur te zjarri i rënë në tregun e “5 Majit”. Gazetari shkroi se përgjigjen e Ramës do ta japë pasdite, ndërsa theksoi se në atë moment po shihte tregun e djegur bashkë me miliona eurot e tregtarëve të vegjël shqiptarë që u shkrumbuan nga flakët e mbrëmjes së kaluar.
“Përgjigjen pasdite se këtë moment po shoh pak tregun e djegur bashkë me miliona eurot e tregtarëve të vegjël shqiptarë që u tretën në zjarrin e mbrëmshëm. Kronikë e zezë dmth”, shkroi Fevziu.
Përplasja mes kryeministrit dhe gazetarit vijon në hapësirën publike, duke rikthyer në vëmendje debatin mbi transparencën, udhëtimet zyrtare dhe përgjegjësinë e pushtetit përballë opinionit publik.
