Festat e fundvitit, që për shumë familje sollën atmosferë festive dhe ngrohtësinë e shtëpisë, për disa të tjera ishin një përballje e dhimbshme me realitetin e ashpër.
Në Thumanë të Krujës, familja e Hava Lleshit e kaloi natën e ndërrimit të viteve mes një kontejneri të ngushtë dhe një shtëpie ende të dëmtuar nga tërmeti shkatërrues i nëntorit 2019.
“Gjatë shtatzënisë kemi qenë në çadra, që na u ofruan nga një qendër dhe pastaj na u dha kontejneri nga një kishë dhe ishte banesa e shumëkërkuar dhe më e sigurta në ato momente për ne…”-shprehet Hava Lleshi
Familja me dy fëmijë të vegjël, njëri prej të cilëve vuan nga çrregullimi i spektrit autik, detyrohet të kalojë shumicën e ditëve në shtëpinë e dëmtuar, mes pasigurisë dhe vështirësive të pafundme. Premtimet për fondin e rindërtimit kanë mbetur vetëm fjalë, duke lënë Havan dhe familjen e saj në pritje të një zgjidhjeje që duket se nuk po vjen kurrë.
“Nuk kemi ku të shkojmë dhe s’kam pas mundësi ekonomike të iki me qira. Edhe bonus qiraje nuk kemi marrë. Është një vend shumë i vogël për të jetuar gjithë kohës brenda. Shkuan 5 vite dhe këtë vit na kanë thënë që do t’i marrim. Tani nuk e di. Presim fondin që të na vijë nga shteti. Uroj të jetë festa e fundit që e kalojmë në të.”
Gjëja më e parë që kërkoj është banesa. Vetëm të shikoj fëmijët brenda në shtëpi, mos të kenë këto vuajtje që po kalojnë. Kam dhe një kërkesë tjetër. Vajzën e kam me autizëm dhe më është ofruar një ndihmë që ta dërgoj vajzën në terapi falas, por nuk kam pasur mundësi ekonomike për ta dërguar. Kam nevojë të më mundësohet rrugëtimi dhe kjo do të ishte diçka shumë e madhe për mua.”
