Nga Ferrari e deri te Rolls-Royce, Lamborghini, Maserati, Bentley dhe Cadillac, rrugët shqiptare po kthehen gjithnjë e më shumë në pasarela luksi, ku xhirojnë mbi 21,800 automjete të klasifikuara si “luksoze”.
Pavarësisht krizave ekonomike apo pasigurive financiare, numri i këtyre makinave me çmime të “kripura” dhe motorë me kapacitet të lartë vazhdon të rritet.
Sipas të dhënave zyrtare nga Drejtoria e Përgjithshme e Tatimeve, mbi 18 mijë prej tyre kanë motorë me fuqi mbi 3,000 cc, ndërsa të paktën 3,668 automjete kushtojnë më shumë se 5 milionë lekë. Në regjistrimin fillestar të tyre, pronarët paguajnë 70 mijë lekë dhe më pas 21 mijë lekë në vit si taksë luksi.
Vetëm gjatë vitit 2023, buxheti i shtetit përfitoi mbi 290 milionë lekë nga taksimi i kësaj kategorie, një rritje prej 9.6% krahasuar me vitin pararendës. Ndërkohë, tarifat për regjistrimet e reja sollën të ardhura shtesë prej gati 187 milionë lekësh, ose 24.4% më shumë se në vitin 2022.
Por jo të gjitha këto makina janë në duart e individëve me të ardhura të deklaruara. Një pjesë e tyre janë në pronësi të zyrtarëve të lartë, biznesmenëve, figurave publike dhe diplomatësh, këta të fundit të përjashtuar nga taksa e luksit.
Ndërkohë, Drejtoria e Kontrollit të Specializuar pranë Administratës Tatimore ka nisur një fushatë verifikimi, pas evidentimit të 400 makinave të blera gjatë periudhës 2023–2024 nga persona pa të ardhura të deklaruara.
Tatimet paralajmërojnë se të gjithë zotëruesit e mjeteve të kësaj kategorie do të përfshihen në analiza të hollësishme për përputhshmërinë e deklarimeve të tyre me burimin financiar të përdorur për blerjen e makinave. Individët që nuk kanë justifikime të mjaftueshme rrezikojnë penalitete të rënda.
