I dyshuari për sulmin vdekjeprurës me kamion në rrugën Bourbon të New Orleans, i cili ndodhi herët të enjten, është identifikuar si Shamsud-Din Jabbar, dhe ka të ngjarë të jetë një “ujk i vetmuar”, pa asnjë bashkëpunëtor të njohur. Kështu deklaroi FBI në një konferencë për shtyp.
Christopher Raia, nga Divizioni i Kundërterrorizmit në FBI, tha se aktualisht nuk ka prova që sugjerojnë se dikush tjetër është i përfshirë në sulm, përveç Jabbar.
Ky konstatim vjen pas një deklarate më pak se 24 orë më parë, në të cilën ndihmës agjentja speciale Alethea Duncan kishte thënë se “Ne nuk besojmë se Jabbar ishte i vetmi përgjegjës”.
Hetuesit fillimisht kishin shqetësime për mundësinë e përfshirjes së pajisjeve shpërthyese të improvizuara, të cilat mund të ishin përdorur për të përgatitur sulmin, përveç kamionit që Jabbar përdori për të shtypur turmën gjatë ditës së Vitit të Ri.
Raia gjithashtu konfirmoi se sulmi ishte një “akt terrorizmi”. Ai theksoi se ky ishte një akt i planifikuar dhe me një qëllim të keq.
Pas këtij sulmi tragjik, FBI bëri me dije se 14 persona humbën jetën në këtë sulm terrorist në New Orleans.
