Fatmir Bektashi u thirr ditën e sotme në SPAK për tu njohur me akuzën penale për çështjen “Partizani”. Bektashi është i përfshirë në aferën korruptive të dosjes së “Partizanit” ku deri më sot ka qenë në masën e sigurisë “detyrim paraqitje”. SPAK ka mbyllur hetimet për çështjen “Partizani” ku ai është hetuar për korrupsion aktiv dhe pastrim parash, por mbetet për tu parë nëse do të merret i pandehur për të njëjtat akuza apo jo. Konkretisht Bektashi akuzohet nga SPAK se ka bashkëpunuar me Jamarbër Malltezin në transferimin e fitimit prej 5.4 milionë euro nga ndërtimet në ish truallin e kompleksit Partizani.
Por kjo gjë duket se nuk e shqetëson fare ndërtuesin Bektashi, përkundrazi ai çdo herë që thirret në SPAK është i buzëqeshur, e me mimika qesharake për kamerat. Në këtë mënyrë ai u bë viral edhe nëpër media në daljen e parë mediatike si personi qesharak i kamerave.
Por si është e mundur që Fatmir Bektashi vazhdon shown e tij para prokurorisë, ndërkohë që është akuzuar për korrupsion në bashkëpunim me Jamarbër Malltezi, dhëndëri i ish-kryeministrit Berisha?!
Si të mos mjaftonte dalja e tij e parë me mimika qesharake, Bektashi dhe gjatë ditës së sotme luajti të njëjtën strategji, duke buzëqeshur, e duke qëndruar para kamerave pa folur për disa minuta. Në këtë mënyrë ai po kalon para opinionit publik pa dhënë llogari për miliona euro të vjedhura nga taksapaguesit.
Habia më e madhe në këtë mes është se Fatmir Bektashi është në detyrim paraqitje, ndryshe nga Berisha dhe Malltezi, edhe pse është kompania e tij që ka ndërtuar vazjhdon të jetë aty. Por, skandali i vërtetë qëndron se pavarësisht akuzave të ngritura nga SPAK ai vazhdon të betonizojë Tiranën. Një nga zonat e quajtura Kompleksi ‘Mangalem’ janë ngritur vinçat dhe po bëhet gati për të ndërtuar pallate të reja, duke e betonizuar të gjithë zonën. Pak më parë sapo përfundoi kompleksin “Kaimi”. Ndërkohë, vijon të ndërtojë vila në Farkë pa asnjë lloj problemi ose kontrolli nga shteti.
Gjithashtu në kompaninë “Homeplan Sh.p.k” të kullave, janë sekuestruar vetëm 45% e aksioneve të Malltezit, ndërsa 55% të ortakut Fatmir Bektashi nuk janë prekur, megjithëse krimin me truallin, ndërtimet dhe transaksionet e pista, këta i kanë bërë bashkë e së bashku janë nën hetim.
Pyetja që mbetet është se përse SPAK nuk vepron për të ndaluar Fatmir Bektashin për të betonizuar më tej Tiranën?! Çfarë marrëveshje i ka ofruar Fatmir Bektashi, SPAK-ut?
