Presidentit Meta i ishte caktuar nga Gjykata Kushtetuese t’iu përgjigjej 72 pyetjeve si një element i domosdoshëm për ecurinë e hetimit të tij.
Ndërkohë ashtu sikurse ishte paralajmëruar, në faqen zyrtare të Presidencës janë publikuar përgjigjet e 72 pyetjeve që Gjykata Kushtetuese i drejtoi Presidentit Ilir Meta, në seancat për shqyrtimin e kërkesë së Kuvendit për shkarkimin e tij.
Në përgjigjen zyrtare, Presidenca thekson se në pyetjet e ngritura nga Gjykata Kushtetuese ka elementë të paragjykimit të çështjes dhe mund të jenë të ndikuara nga perceptimi propagandistik.
7.2.2022_Pyetje-Pergjigje_Presidenti_GJK-FINALE-Converted
“Pas shqyrtimit të përmbajtjes së të gjithë pyetjeve, rezultoi se disa prej tyre në dukje përmbajnë elementë të paragjykimit të çështjes dhe mund të jenë të ndikuara nga perceptimi propagandistik”, sqaron Presidenca.
Kujtojmë që Meta nuk u paraqit në Komisionin Hetimor të ngritur për të. Kjo ka qenë edhe një nga pyetjet e bëra nga ana e Gjykatës Kushtetuese, që lidhet me mungesën e tij, për të cilën kreu i shtetit ka dhënë argumentet.
Pyetja:
Ju keni refuzuar të merrni pjesë në seancën hetimore, duke pretenduar se keni pasur takime të programuara zyrtarisht me përfaqësues të lartë të vendeve të tjera. A ka ndodhur në praktikën tuaj që të ndryshoni takimet kur e kanë kërkuar rrethanat? A ka qenë ky shkak për mosparaqitjen tuaj në seancat dëgjimore të zhvilluara nga komisioni hetimor dhe Kuvendi?
Përgjigjia e Metës:
Pyetja nuk është korrekte. Presidenti më së pari, asnjëherë nuk ka refuzuar takimin, madje ka kërkuar të dëgjohet nga Komisioni për çështjet ligjore, që nuk zhvillon seancë hetimore, siç ju referoni në pyetjen tuaj.
Lutemi t`i referoheni shkresave të datës 5 dhe 6 maj 2021, të Institucionit të Presidentit, ku ka shprehur gatishmërinë për t`u takuar, diskutuar dhe t`u dëgjuar në Komisionin për çështjet ligjore në datën 10 maj 2021, e duke kërkuar caktimin dhe të orës së takimit. Për më shumë, referojuni shkresave të Presidentit të Republikës nr. 1520/2 Prot., datë 5.5.2021 dhe nr. 1533/2 prot., datë 06.05.2021, dhe qëndrimeve të dorëzuara nga Presidenti i Republikës që në datën 1 korrik 2021 (faqe 88 e në vijim). Komisioni për çështjet ligjore, në funksion të urdhrit politik, komunikoi në mënyrë ultimative me Presidentin e Republikës, duke i kërkuar që për një çështje kaq të gjerë dhe të madhe, të paraqitej në më pak se 20 orë.
