Fatbardh Kadilli është ndër emrat e Partisë Demokratike që ka kërkuar dorëheqjen e Lulzim Bashës pas humbjes së zgjedhjeve të 25 prillit. Së fundi ai ka qenë i ftuar në emisionin “Zonë e lirë”, aty ku Basha bëri daljen e fundit televizive para zgjedhjeve. Kadilli ka thënë se në çdo rast që humbet, partia duhet të futet në një proces radikalizimi, për t’u hapur një proces i ri. Për Kadillin, ai që është përgjegjës dhe nuk ia del të mos blihet vota, duhet të largohet. Ndër të tjera Kadilli foli edhe për takimin e fundit me Bashën, për të cilin tha se zgjati një orë e gjysmë dhe ishte mjaft produktiv.
“Kisha një sekret të brendshëm kur mora ftesën tënde, dalja e fundit e Bashës ka qenë të premten këtu, aty ku për mua mbylli fushatën e tij politike. E kam kënaqësi që rrugën time ta filloj këtu. S’kam marrë asnjë rrogë nga PD-ja. Në 8 vjet që jam në opozitë nuk kam marrë asnjë lloj pagese, falë mbështetjes së familjes time. Nuk prita 1 javë se jam shumë i qartë për atë që i mungon PD-së dhe për ndryshimin që duhet të ketë. Në çdo lloj rasti që kemi dalë humbës, partia futet në një proces radikalizimi, mbyllet dhe pastaj fillon një proces për t’u hapur. Ai që është përgjegjës nëse nuk ia del që mos të blihet vota, duhet të largohet. Detyra jonë është që sot të krijojmë një opozitë të re, që nuk ankohet për cenet e shqiptarëve, i ngjall energjinë politike shqiptarëve. Jam i bindur që e bëj unë më mirë se sa ai. Takimi i fundit me Bashën ka zgjatur mbi 1 orë e gjysmë dhe ka qenë shumë produktiv”, u shpreh Kadilli.
