Shoqëria shqiptare duket se do vijojë të udhëhiqet për shumë gjatë nga motoja ‘ Ne nuk na gjen gjë’ e këtë e vërtetoi më së miri këto 3 ditë që vendi ynë është prekur nga COVID-19, duke mos u ndërgjgjësuar dhe duke frekuentuar vendet publike, sidmos lokalet.
Kryeministri, ministrja Manastirliu dhe mjekët kanë bërë thirrje që qytetarët duhet të qëndrojnë në shtëpi e të shmangin sa më shumë daljet dhe duke qenë se kanë hasur në mosbindjen e tyre, qeveria vendosi të forcojë masat.
Rama urdhëroi mbylljen e çdo lokali, restoranti, pubi e çdo vendi tjetër publik, teksa u ndërpre edhe transporti publik në Tiranë e Durrës.
Po ashtu, Policia e Shtetit e asistuar dhe nga Policia Ushtarake ka nisur prej pasdites së sotme ngritjen e postblloqeve në gjithë vendin për evidentimin e personave që kanë ardhur dy javët e fundit nga Italia në Shqipëri dhe nuk janë vetëkarantinuar.
Drejtori i Rendit Publik, Albert Dervishaj, i ftuar në ‘Opinion’ është shprehur se ndonëse kanë kaluar vetëm 5 orë nga dalja në terren, janë evidentuar mbi 100 shtetas të cilën nuk kanë zbatura urdhrin.
“Mbi 100 persona janë evidentuar në pesë orët e fundit. Janë evidentuar nga Policia, nga shërbimet e sotme. Këta personat kanë ardhur nga Italia në dy javët e fundit. Nga Policia nuk ka asnjë person të prekur deri tani”, është shprehur Drejtori i Rendit Publik Albert Dervishaj.
Deri tani, numri i të infektuarve vijon të jetë 15 persona, teksa priten rezultatet e analizave për shumë të tjerë.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
