Zjarret masive vazhdojnë të përfshijnë pjesë të mëdha të Kanadasë, ndërsa autoritetet kanë intensifikuar evakuimet emergjente, duke e përshkruar situatën si alarmante.
Ekipet e zjarrfikësve i quajnë këto zjarre “monstra”, për shkak të përmasave dhe intensitetit të tyre, ndërsa flakët po kërcënojnë fshatra të tërë dhe zona të gjera pyjore.
Provincat Saskatchewan dhe Manitoba kanë shpallur gjendje të jashtëzakonshme, teksa mbi 200 vatra janë aktive në të gjithë territorin kanadez, rreth gjysma e tyre konsiderohen jashtë kontrollit.
Vetëm një nga këto zjarre ka përfshirë 4.7 milionë hektarë bimësi, ndërsa një tjetër, në perëndim të vendit, ka shkrumbuar 1.4 milionë hektarë.
Më shumë se 31 mijë persona janë detyruar të braktisin banesat e tyre dhe të zhvendosen qindra kilometra larg. Shërbimi zjarrfikës ka mobilizuar gjithë stafin në terren dhe po merr ndihmë nga rreth 140 zjarrfikës amerikanë.
Tymi i dendur ka përkeqësuar ndjeshëm cilësinë e ajrit, jo vetëm në qendër të Kanadasë, por edhe në pjesë të veriut të Shteteve të Bashkuara.
Autoritetet paralajmërojnë se këto fenomene ekstreme po përkeqësohen nga ngrohja globale dhe ndryshimet klimatike. Kanadaja ka hyrë në një cikël gjithnjë e më të rrezikshëm zjarresh, me sezonin e vitit 2023 që mbetet më i rëndi në histori.
Por edhe këtë vit, alarmi ka rënë herët, deri më tani janë djegur mbi 22 milionë hektarë, një sipërfaqe më e madhe se i gjithë territori i Sllovenisë.
