Një natë e gjatë dhe e vështirë ka goditur zonën e Finiqit, ku forcat zjarrfikëse të bashkive Finiq, Delvinë, Konispol dhe Sarandë, të mbështetura nga pesë mjete zjarrfikëse dhe rreth 70 efektivë të Forcave të Armatosura, kanë luftuar pa ndërprerje për të përballuar disa vatra zjarri të fuqizuara nga era e fortë.
Flakët janë përhapur në fshatrat Velahovë, Livinë, Ardhasovë, Bistricë dhe Krongj, duke krijuar rrezik të madh për banorët dhe infrastrukturën.
Për shkak të situatës kritike, autoritetet kanë evakuuar përkohësisht banorët në Livinë dhe Ardhasovë, ndërsa ekipe të specializuara kanë ofruar ndihmë mjekësore për të moshuarit.
Në orët e para të mëngjesit është zhvilluar një operacion emergjent për të ndaluar përhapjen e flakëve drejt Hidrocentralit të Bistricës, një nga objektet strategjike të zonës.
Për shuarjen e plotë të zjarrit, pritet ndërhyrje nga ajri gjatë ditës së sotme. Ndërkohë, për arsye sigurie, qarkullimi i mjeteve në aksin Muzinë–Bistricë është kufizuar deri në përfundimin e operacioneve.
Forcat në terren vijojnë kontrollin e zonave të prekura, duke monitoruar çdo pikë që mund të riaktivizohet nga era dhe temperaturat e larta të parashikuara.
