Mbiemri është një nga gjërat që nuk mund ta zgjedhin në jetë, pasi na trashëgohet nga të parët.
Mirëpo jo të gjithë janë të lumtur me mbiemrin që kanë.
Familja Matrapazi në Elbasan është bërë shpesh objekt talljeje dhe paragjykimi nga shoqëria.
E lodhur nga kjo situatë, Hamide Matrapazi kërkon që të ndryshojë mbiemrin, shkruan ‘Faxweb’.
Ajo mendon se Selimi do të ishte një mbiemër i përshtatshëm për të dhe fëmijët e saj.
Në institucionet shtetërore, ajo është hasur me me kërkesën e çuditshme, se duhet ta shpallë vendimin e saj në të paktën dy botime gazetash.
Drejtori i Gjendjes Civile në Elbasan, Behar Tashi, bën me dije se kur mbiemri përmban elementë fyes, dhe personat duan ta ndryshojnë si në rastin e zonjës Hamide, bëhet kërkesa fillimisht në Gjendjen Civile, më pas në bashki, prefekturë dhe në fund në drejtorinë e Përgjithshme të Gjendjes Civile.
Në këtë moment sipas Tashit, bëhet edhe shpallja në gazetë.
Ndërsa pranon anomalinë e ligjit shqiptar, ai thotë se është Komisioni i Drejtorisë së Përgjithshme që thotë fjalën e fundit.
Zonja Hamide ndërkohë i ka ndjekur të gjithë hapat dhe i ka mbetur vetëm publikimi në gazetë.
