Erisa Xhixho, kandidate e koalicionit “Shqipëria Madhështore” në qarkun e Tiranës dhe nënkryetare e Partisë së Lirisë, ka reaguar ndaj një raporti të publikuar nga agjencia ndërkombëtare e vlerësimit Standard & Poor’s, duke theksuar se sipas analizës së tyre, anëtarësimi i Shqipërisë në Bashkimin Europian deri në vitin 2030 nuk është i realizueshëm.
Në një postim në Facebook, Xhixho shkruan se raporti vë në dukje dobësitë strukturore që pengojnë përparimin e vendit në këtë drejtim:
“Vlerësimi i Shqipërisë mbetet i kufizuar nga kuadri institucional relativisht i dobët, mundësitë e kufizuara të politikës monetare dhe nevojat e moderuara për financim të jashtëm. Mbi 50% e borxhit të qeverisë është në monedhë të huaj ose me afat të shkurtër. Për më tepër, ekonomia përdor gjerësisht euron dhe është shumë informale.”
Sipas saj, këto janë tregues të qartë se qeveria aktuale nuk ka ndërmarrë përpjekjet e nevojshme për të përshpejtuar ritmin e reformave, që do ta afronin vendin me standardet e BE-së. Ajo citoi më tej konstatimin kryesor të raportit të S&P:
“Pa një përpjekje të konsiderueshme për të përshpejtuar ritmin e reformave, ne e konsiderojmë të pamundur që Shqipëria të jetë e pranueshme për anëtarësim në BE përpara vitit 2030.”
Duke e cilësuar këtë si një tjetër mashtrim elektoral të kryeministrit Rama, Xhixho theksoi se qytetarët do të reagojnë ndaj premtimeve të pabazuara në realitet:
“Më 11 maj, shqiptarët do të zgjedhin programin e Aleancës për Shqipërinë Madhështore, duke refuzuar çdo përpjekje të dëshpëruar të Edi Ramës për të mbajtur pushtetin me mashtrime.”
Deklarata vjen në prag të fushatës zgjedhore, ndërkohë që debati mbi integrimin europian të Shqipërisë po merr gjithnjë e më shumë vëmendje në diskursin publik dhe politik të vendit.
