Ndërkohë që protesta tek kryeministria vijon, Erion Veliaj sapo është regjistruar në KQZ si kandidat për Bashkinë e Tiranës nën siglën e “Aleancës për Shqipërinë Europiane”.
Në KQZ sapo është depozituar edhe lista e ASHE me 100 kandidatët për Këshillin Bashkiak.
Që në ditën e parë si kryebashkiak, Veliaj u zotua për t’i dhënë kryeqytetit një frymë të re, më moderne, për ta kthyer në një qytet të jetueshëm për njerëzit.
Një nga vendimmarrjet e para të tij ishte pikërisht reformimi i shërbimit të pastrimit publik dhe aksionet për vendosjen e kontrollit në hapësirat urbane, të cilat ishin zaptuar padrejtësisht. Aksion i cili tregoi për vendosmërinë e tij për t’i ndryshuar fytyrën Tiranës, duke nisur me mbajtjen pastër të saj.
Dita e sotme (13 maji) është afati i fundit i regjistrimit të kandidatëve për kryetar bashkie dhe kandidatëve për këshillin bashkiak në Komisionin Qëndror të Zgjedhjeve.
Subjektet politike që do të garojnë në zgjedhjet vendore të 30 qershorit do të kenë afat për tu regjistruar deri në orën 12 në mesnatë.
Deri tani subjektet që do të regjistrojnë kandidatët për kryetar bashkie në KQZ janë “Aleanca për Shqipërinë Europiane”, koalicioni “Shpresa për ndryshim”, si dhe “Bindja Demokratike” e ish-demokratit, Astrit Patozi.
