Kryebashkiaku Erion Veliaj paditi në Gjykatën e Tiranës kreun e PD-së, Lulzim Bashën dhe deputeten demokrate Jorida Tabaku. Arsyeja e padisë lidhet me shkeljet për lejet e ndërtimit kur ushtronin funksionin e kryetarit dhe nënkryetares në Bashkinë e Tiranës.
Por kjo është padija e vetme që kreu i Bashkisë bëri në emër të dy politikanëve. Veliaj paditi gjithashtu për shpifje Bashën dhe Tabakun për akuzat e bëra prej tyre lidhur me devijimin e rrjedhës së lumit të Lanës dhe projektit të Unazës së Re.
Veliaj i cilëson akuzat tërësisht të pavërteta dhe pa asnjë provë, për këtë arsye ai kërkon që të paditurit të shpërblejnë dëmin jo pasuror të shkaktuar ndaj tij me shumën 100.000 mijë lekë, si dhe shpenzimet gjyqësore dhe ato avokatore.
“E paditura ka shpifur publikisht kur deklaron ngjarje dhe fakte tërësisht të pavërteta. Nga momenti i deklarimeve publike të së paditurës dhe deri më datën që po depozitohet kjo kërkesë padi, nga Bashkia e Tiranës dhe paditësi, kryetari i Bashkisë, Erion Veliaj nuk ka dhe nuk është miratuar asnjë leje ndërtimi në favor të subjektit që përfaqësohet nga zoti Edmond Bego. Ndaj deklarimet publike të të paditurës janë deklarata që bazohen në shpifje dhe fyerje të paditësit, për shkak të funksionit që ai kryen si Kryetar i Bashkisë Tiranë”, thuhet në padi.
Bashkia e Tiranës i ka përgënjeshtruar disa herë deklaratat e çiftit Basha-Tabaku lidhur me projektin në fjalë, duke theksuar se nuk ka miratuar asnjë leje ndërtimi në atë zonë.
