Ditën e sotme, Komisoni Qendror i Zgjedhjeve i ka dhënë sot mandatin Fredi Belerit, që fitoi në zgjedhjet e 14 majit përballë Jorgo Goros. Nga sot Beleri është kryetar i mandatuar i Bashkisë së Himarës, por me shumë sfida përpara se të ulet në karrigen e pushtetit
Atij i duhet të kapërcejë një tjetër hallkë proceduriale, betimin para Këshillit Bashkiak. Ky aspekt procedurial mund të kthehet në ngërç për Belerin që është në burg, dhe mbetet për tu parë se si do të veprohet në kushtet kur një kryetar bashkie para se të nisë punën duhet të betohet në Këshillin Bashkiak.
Kujtojmë që Fredi Beleri, u arrestuar 2 dditë para zgjedhjeve vendore, teksa akuzohet për shit-blerje të votave. Arrestimi i tij ka ngjallur disa reagime të forta nga vendi fqinj, Greqia. Vetë kryeministri grek në një deklaratë zyrtare paralajmëroi se nëse nuk merren masa për lirimin e Belerit, Greqia do të bëhet pengesë për integrimin e Shqipërisë në Bashkimin Europian.
Ndërkohë, KQZ dha sot rezultatin dhe për 11 bashki të tjera dhe 12 këshilla bashkiakë.
Po ashtu u certifikua rezultati për kryetarët e bashkive Finiq (Romeo Cakuli), Selenicë (Nertil Bellaj), Dropull (Dhimitraq Toli), Kolonjë (Erion Isai), Devoll (Eduard Duro), Maliq (Gëzim Topçiu), Dimal (Juliana Memaj), Malësi e Madhe (Tonin Marinaj), Kavajë (Fisnik Qosja), Librazhd (Mariglen Disha), Pogradec (Ilir Xhakolli).
