Një ngjarje e rëndë ka ndodhur në Vlorë, ku një 25- vjeçar është ekzekutuar në derën e shtëpisë së tij natën e Fiter Bajramit me 5 plumba nga 10 që u shtinë mbi të.
Ngjarja e rëndë ka ndodhur pak pasi akrepat e orës kanë shënuar 00:00, pranë zonës së quajtur “7 pallatet”, ku si pasojë e plumbave të marra ka gjetur vdekjen menjëherë Kristian Breshanaj.
I riu kishte 3 muaj që ishte kthyer nga Belgjika dhe ishte djali i një mjeku reanimator në Spitalin e Vlorës.
Pas ngjarjes së rëndë, autorët dogjën makinën tip BMW me targa greke, në një nga rrugicat e lagjes “10 Korriku, shumë afër vendit të ngjarjes, teksa brenda mjetit u gjet edhe arma tip kallashnikov, e cila u përdor gjatë atentatit.
Nuk dihen detaje për këtë ngjarje të rëndë, por Policia ka nisur hetimin për të zbardhur detajet dhe deri më tani ka shoqëruar 12 persona
Njoftimi i policisë
Në lagjen “Uji i Ftohtë”, pranë zonës së quajtur “7 pallatet”, në rrethana ende të paqarta është vrarë në rrugë dyshohet me armë zjarri shtetasi K. B., 25 vjeç.
Forca të shumta të policisë kanë shkuar menjëherë në vendngjarje, janë ngritën pika kontrolli dhe vijon krehja e zonës për kapjen e autorit/ëve.
Gjatë krehjes së zonës, në një nga rrugicat e lagjes “10 Korriku” Vlorë, shërbimet e Policisë kanë konstatuar në flakë një automjet, brenda të cilit është gjetur një armë zjarri automatik kallashnikov, e cila dyshohet të jetë arma e krimit. Policia e Vlorës ka nisur të shoqërojë persona që mund të kenë dijeni për rrethanat e krimit.
