Një ngjarje e rëndë ka tronditur mëngjesin e sotëm fshatin Talë në Lezhë, ku një 57-vjeçar është ekzekutuar me armë zjarri në oborrin e banesës së tij.
Viktima është identifikuar si Pjetër Kaza, i cili u qëllua për vdekje sapo kishte mbërritur në shtëpi, pas përfundimit të turnit të natës në minierën e Spaçit, në Mirditë.
Trupi i pajetë është gjetur brenda në automjet nga bashkëshortja e tij, rreth orës 05:00 të mëngjesit.
Sipas të dhënave të para, ai po parkonte makinën kur është qëlluar me armë zjarri, ndërsa autorët nuk janë identifikuar ende.
Pista kryesore që po hetohet nga grupi hetimor lidhet me një hakmarrje të mundshme mes fiseve Kaza dhe Gjini, një gjakmarrje e nisur që në vitin 1994.
Në atë vit, u vra shefi i Krimeve të Policisë, Ndue Kaza, nga vëllezërit Dod dhe Agustin Gjini. Në vitin 1997, Martin Kaza, anëtar i fisit të viktimës vrau dy vëllezërit Gjini, për çka u arrestua më vonë në Londër dhe u ekstradua në Shqipëri në vitin 2017, ku po vuan dënimin.
Përplasja mes dy fiseve nuk përfundoi me kaq. Vitin e kaluar, në Belgjikë, u ekzekutua me katër plumba Agustin Kaza, vëllai i Pjetër Kazës, viktimës së sotme.
Policia vendore, e mbështetur nga Forcat Kombëtare të Sigurisë dhe Njësia Shkodër, ka blinduar zonën përreth banesës ku ndodhi vrasja, duke mbledhur dëshmi dhe prova nga vendngjarja.
Grupi i posaçëm hetimor i ngritur për çështjen po punon nën drejtimin e Prokurorisë për të zbardhur rrethanat e krimit dhe për të identifikuar autorët e atentatit.
Ndërkohë, tensioni në zonë është i lartë për shkak të përplasjes së gjatë dhe të përgjakshme mes dy fiseve, që duket se ende nuk ka marrë fund.
