Vëllai i Talo Çelës, Bujar Çela, është ekzekutuar me armë zjarri në orët e para të mëngjesit të sotëm në Bradashesh të Elbasanit.
Bëhet me dije se Bujar Çela, vëllai i Talo Çelës, i cili është shpallur në kërkim ndërkombëtar për grabitjen e miliona eurove në Rinas, është vrarë sapo ka zbritur nga makina e tij, në hyrje të një lokali te rrethrrotullimi i Bradasheshit. Autorët, kanë qenë të maskuar dhe të armatosur dhe e kanë qëlluar për vdekje Bujar Çelën sapo ai ka zbritur nga makina.
Ndërkohë policia ka shkuar në vendngjarje, së bashku me forcat Renea, të cilët kanë filluar krehjen e zonës.
Njoftim i Policisë:
Rreth orës 05:45 , në fshatin Bradashesh, Elbasan, në rrethana ende të paqarta është vrarë me armë zjarri para një lokali shtetasi B.Ç., rreth 50 vjeç, banues në fshatin Bradashesh, Elbasan.
Grupi hetimor ndodhet në vendngjarje dhe vijon puna për zbardhjen e plotë të rrethanave të ngjarjes , identifikimin e kapjen e autorit/ëve. Shërbimet e Policisë kanë ngritur pika kontrolli në hyrje -dalje të qytetit të Elbasanit, pika kontrolli në akset rrugore nacionale në bashkëpunim me DVP Durrës, Fier e Tiranë .
Në ndihmë të shërbimeve të DVP Elbasan kanë ardhur dhe FNSH dhe RENEA dhe vijon krehja e zonës.
