Policia raporton se Shkëlzen Kastrati u vra në rrugë nga të shtënat e armëve paraditen e sotme në Fier. Fillimisht është raportuar për një aksident pasi autorët i kanë zënë pritë viktimës me një mjet luksoz tip Mercedes Benz CLS. Kur Kastrati ka dalë nga rrethrrotullimi i Sheqit me mjetin e tij tip Mercedes Benz ML, është përplasur dhe më pas është qëlluar me armë.
Forca të shumta policie kanë mbërritur në vendngjarje dhe kanë rrethuar zonën. Personi i vrarë ndodhet brenda mjetit të tij tip Mercedes Benz ML. Në zonën ku ka ndodhur ngjarja, vendi i quajtur rrethrrotullimi i Sheqit, janë grumbulluar shumë qytetarë.
Ndërkohë, pak më parë është gjetur dhe në afërsi të fshatit Mbrostar një mjet tjetër luksoz tip Range Rover, të cilit i kanë vënë flakën në një fushë pranë vendit ku po ndërtohet spitali i ri i Fierit. Sipas burimeve, mjeti ti[p Range Rover është pikërisht i personave që i zunë pritë dhe ekzekutuan Shkëlzen Kastratin.
Viktima mendohet se është rreth 40 vjeç, me origjinë nga Kukësi. Vrasja e tij dyshohet paraprakisht se është bërë për hakmarrje.
“Sot rreth orës 10:30, në vendin e quajtur “Ura e Sheqit”, një shtetas i paidentifikuar, ka vrarë me armë zjarri shtetasin Sh. K., i cili ka qënë në automjetin tip “Benz”. Autori është larguar nga vendngjarja me një automjet tip “Range Rover”, i cili u gjet nga shërbimet i djegur te vendi i quajtur “Mbikalimi i Baltzës”, njofton Policia.
Atentati ndaj të vëllait në 2016
Në ditët e para të janarit 2016, pak kilometra larg vendit ku u vra sot Shkëlzen Kastrati dhe ku u gjet i djegur mjeti tip Range Rover, u qëllua me breshëri plumbash Kelmend Kastrati, vëllai i viktimës së atentatit të sotshëm.
Kelmend Kastrati ishte në makinë me dy persona të tjerë, një prej të cilëve fatkeqësisht humbi jetën. Në afërsi të Mbrostarit, në vendin e quajtur “Mulliri i Artë”, Kelment Kasatratit, Denis Kasajt dhe Elton Margaritit, iu bë atentat.
Si pasojë e të shtënave mbetën të plagosur të tre udhëtarët në makinë, por fatkeqësisht një prej tyre, Denis Kasaj, nuk mundi të jetonte.
Prishja e pazareve të drogës në Holandë
Dyshimet kryesore për atentatin në atë kohë lidheshin me prishjen e pazareve të drogës në Holandë.
Dy ditë para atentatit Elton Margariti ishte kthyer nga Holanda. Nga burime prën grupit hetimor u mësua se Margariti kishte pasur konflikte në këtë shtet, për shkak të trafikimit të lëndëve narkotike. Kurse viktima Denis Kasaj ishte kthyer nga Italia për festat e fundvitit. Megjithëse mbeti viktimë, policia thotë se deri tani nuk ka të dhëna se Kasaj ka precedent penalë të njohur.
Ndërkohë, edhe i treti person që ndodhej në makinë, Kelmend Kastrati, nga Fieri, kishte pasur më parë probleme me drejtësinë, pasi në vitin 2008 ai plagosi dy vëllezër për shkak të një sherri për parkimin.
Për këtë ngjarje u arrestua Florian Bushi, agjent i Shërbimit Informativ Shqiptar, pasi u kishte treguar autorëve vendndodhjen e Klemend Kastratit dhe dy personave të tjerë. Gjithashtu, për ngjarjen në fjalë u arrestuan dhe Ilir Memushaj dhe Ylli Nazëraj.
/Gazetareforma.com/
