Policia e Tiranës ka shpallur në kërkim si autor të dyshuar 33-vjeçarin Dervis Arapi, për vrasjen e 26-vjeçarit Jurgen Kurti pranë banesës së tij në kryeqytet.
Dervis Arapi është djali i tregtarit Agim Arapi i vrarë në prill të 2017, ku i dyshuar ishte dhe Jurgen Kurti.
Nga burime të policisë mësohet se Dervis Arapi sipas sistemit TIMS nuk ndodhet në Shqipëri që prej Janarit.
Ende nuk dihen provat që çuan Policinë e Tiranës tek emri i 33-vjeçarit dhe shpalljen e tij në kërkim, ndërsa rasti në fjalë është referuar në prokurori si gjakmarrje.
Policia ka dyshime se ai ka hyrë në mënyrë ilegale në Shqipëri, ose ka paguar persona të tjerë për vrasjen e Kurtit.
Pas kësaj ka reaguar nëna e 33-vjecarit Vjollca Arapi e cila në një prononcim për “News24”, tha se djali i saj nuk ka lidhje me vrasjen.
Ajo i ka bërë apel shtetit që të gjejë autorët e vërtetë të vrasjes, pasi familja e saj nuk ka lidhje dhe po i shkatërrojnë jetën.
Ndërkohë për sa i përket vrasjes së bashkëshortit të saj, Agim Arapi në 11 prill 2017, i dyshuari kryesor ishte Jurgen Kurti.
Për sa i përket rolit të tij, policia thotë se viktima ia ka kërkuar paratë për tubin e aspirimit Jurgenit, por më pas kanë ndërhyrë dy vëllezërit Ekonomi, një prej tyre vjehrri i të riut dhe e kanë futur në market ku e kanë rrahur brutalisht sa ka humbur jetën për shkak të problemeve me zemrën.
Pavarësisht se në vendin e ngjarjes është gjetur një thikë dhe fillimisht u tha se Arapi ishte qëlluar me thikë dhe kishte ndërruar jetë për shkak të plagëve të marra, policia në njoftimin zyrtar deklaroi se 51-vjeçari ka vdekur për shkak të një ataku kardiak.
