Prokuroria e Fierit ka dërguar për gjykim dosjen ndaj dy vëllezërve Kreshnik dhe Agim Gashi, të cilët akuzohen si autorët e vrasjes së Erjon Javorit, ngjarje e ndodhur më 7 dhjetor 2023 në Fier.
Sipas aktakuzës, ndaj tyre rëndojnë veprat penale “Vrasje me paramendim” në bashkëpunim si dhe “Mbajtje pa leje dhe prodhim i armëve, municioneve dhe lëndëve shpërthyese”.
Hetimet e Prokurorisë kanë zbuluar se atentati ndaj Javorit është kryer në afërsi të banesës së viktimës, në lagjen “16 Prilli”, ku ai u gjet i pajetë brenda automjetit të tij Porsche Cayenne.
Sipas dinamikës së ngjarjes, Agim Gashi, i njohur edhe me nofkën “Agli” ka qëlluar me pistoletë drejt Javorit, i cili ka tentuar të reagojë me armë ndaj tij dhe vëllait të tij, Kreshnik Gashi.
Por një prej plumbave të Agim Gashit e ka goditur Javorin në kokë, duke i shkaktuar vdekjen e menjëhershme.
Pista e hetimit ka zbuluar se motivi i krimit lidhej me një konflikt të mëparshëm mes palëve, i karakterizuar si banal, por që kishte mbetur i pazgjidhur.
Përveç dy të pandehurve kryesorë, Prokuroria ka çuar për gjykim edhe tre persona të tjerë, të akuzuar për ndihmë pas krimit:
• Rexhep Puka, për veprën penale “Përkrahja e autorit të krimit”,
• Shtetasi A.L., për “Moskallëzim krimi”,
• Shtetasja E.Xh., për “Deklarim të rremë para oficerit të policisë gjyqësore”.
Viktima, Erjon Javori, rezulton të jetë nipi i Medi dhe Demir Backës, dy emra të njohur të botës së krimit në Fier.
Medi Backa u vra në vitin 1997 gjatë Masakrës së Levanit, ndërsa Demir Backa u ekzekutua më 23 tetor 2021 në qendër të qytetit.
