Një prezervativ 200-vjeçar do të ekspozohet këtë javë në muzeun më të famshëm të Holandës, Rijksmuseum në Amsterdam, krah veprave të epokës së artë holandeze.
Ky kontraceptiv i rrallë, një suvenir luksoz i shekullit të 19-të, është i pari i llojit të tij që bëhet pjesë e koleksionit të këtij institucioni prestigjioz.
Mendohet se daton rreth vitit 1830 dhe është prodhuar në Francë, ndoshta në një bordello të nivelit të lartë në Paris.
Është përpunuar nga membranë shtazore, me shumë mundësi nga apendiciti i një deleje, material që përdorej përpara shpikjes së gomës së vullkanizuar.
Ajo që e bën të veçantë është një ilustrim erotik i gdhendur mbi të, ku shfaqet një murgeshë gjysmë e zhveshur që tregon me gisht organin gjenital të njërit prej tre klerikëve.
Nën figurë gjendet mbishkrimi në frëngjisht: Voilà, mon choix – “Ja, kjo është zgjedhja ime”.
Kuratorja Joyce Zelen thotë se ilustrimi është një satirë ndaj mitit të Gjykimit të Parisit, ku një princ duhet të zgjedhë mes tri perëndeshave. Sipas saj, ky detaj sugjeron që blerësi i parë ishte një person me shije të hollë dhe njohuri kulturore.
Objekti u ble për 1000 euro në një ankand në Haarlem muajin e kaluar dhe tani është vendosur në një kuti qelqi, pjesë e ekspozitës “Seks i sigurt?”.
Kjo ekspozitë përfshin vizatime dhe gravura historike që trajtojnë seksualitetin, shëndetin dhe punën seksuale në shoqëritë evropiane.
Para shekullit të 19-të, prezervativët nuk ishin të përhapur dhe prodhoheshin nga materiale të pazakonta si liri, zorrë kafshësh apo guaska breshkash.
Efikasiteti i tyre për të parandaluar shtatzëninë apo sëmundjet seksualisht të transmetueshme ishte i kufizuar. Në vitet 1830, përdorimi i tyre nuk pranohej nga shoqëria, veçanërisht nga kisha.
Shiteshin në fshehtësi, zakonisht në shtëpi publike, megjithëse dokumentet flasin për dyqane luksoze që i ofronin për klientelë të veçantë.
