Tërhiqet nga Kuvendi projektligji për shpalljen e Gjirit të Sarandës, det historik. Drafti ishte propozuar dhe firmosur nga deputeti Kostaq Papa, i cili për shkaqe të panjohura e ka tërhequr projektligjin që lidhe drejtpërdrejt me negociatat për kufirin detar me Greqinë. E çuditshme është se projektligji u dorëzua nga një deputet i djathtë dhe jo nga qeveria Rama. Në kontekstin e negociatave me Greqinë tërheqja flet për një ndryshim në kursin zyrtar në këto bisedime.
Në nenin 1 të këtij dokumenti propozohej: “Deti i Gjirit të Sarandës, Butrintit, Ksamilit, Himarës, Borshit, Qeparoit, Palasës, përmbush kushtet e detit historik dhe shpallet Det Historik” .
Në relacionin e projektligjit theksohej së qëllimi ishtë që të mbyllte mundësinë për korrupsion me ujërat detare e detin territorial shqiptar nga nënpunes të shtetit shqiptar gjatë tratativave për marrëveshje me vendet fqinjë.
Deti i Gjirit të Sarandës është Det Historik dhe njihet që në lashtësi me ardhjen e Eneas dhe grupit te luftëtarëve të tij pas largimit nga Troja e rrënuar; qëndrimi në Butrint apo në Onhezmin, Sarandën e sotme.
Gjiret historike deklarohen nga vetë shteti. Të tilla deklarime janë të njohura në praktikën ndërkombëtare. Në vitin 2009, sipas denoncimit të bërë në atë kohë nga kolonel Myslym Pashaj, grupi negociator shqiptar ka bërë një lëshim fatal dhe nuk dihet nëse e ka bërë nga mosdija apo nga faktorë të tjerë antikombëtarë që s’i njohim dot, gjiri i Sarandës është braktisur. Matjet për ndarjen detare janë bërë nga vija përmbyllëse e gjirit të qytetit.
Një titullim historik do të thotë se asnjë shtet tjetër nuk mund të ketë forcë për të ushtruar të drejta ndaj kësaj gjeohapësire detare, që i referohet këtij titullimi.
/GazetaReforma.com/
