Tiranë – Tedi Blushi, Sekretari i Përgjithshëm i Partisë së Lirisë, i cili foli me tone të ashpra në protestën para Bashkisë Tiranë, akuzoi drejtpërdrejtë Veliajn për korrupsion dhe shkelje të të drejtave të qytetarëve. “Jemi këtu prej katër javësh për të protestuar ndaj një kryetari bashkie që ka thyer çdo rekord në krim, vjedhje, dhunim të drejtave të qytetarëve të Tiranës,” tha Blushi gjatë fjalës së tij. Ai shtoi se koha për fjalë ka mbaruar, duke e quajtur bashkinë “një burg të madh të rrethuar nga Policia.”
Në një apel emocional, Blushi u drejtua edhe tek forcat e rendit të pranishme në protestë, duke i bërë thirrje të mos përdoren si mjet për të përballur popullin. “Ashtu si edhe populli, edhe ju policë me apo pa uniformë, jeni të vjedhur njësoj si ne. Mos u përdorni për t’u përballur me popullin! Nuk ka regjim që të ndalë popullin të kërkojë drejtësi,” u shpreh ai.
Protesta vazhdon të jetë e tensionuar, me praninë e madhe të policisë dhe thirrje të vazhdueshme për ndryshime të thella në qeverisjen lokale të kryeqytetit.
Kujtojmë se protesta vjen pas arrestimit të pesë zyrtarëve të lartë të bashkisë nga SPAK, të akuzuar për korrupsion dhe abuzim me detyrën.
