Një 47-vjeçare, e cila ka bashkëpunuar me Policin italiane për të shkatërruar një grup prostitucioni është vetëvrarë, pasi i është refuzuar nënshtetësia italiane. Ilgiorno shkruan se Adelina Sejdini në vitin 1996 denoncoi në Polici tutorët e saj, të cilët e shfrytëzuan për vite me rradhë në Itali.
Ajo për vite me radhë kishte kërkuar statusin e refugjatit në Itali, por që gjithmonë i është refuzuar. Ndërkohë që disa ditë para se të vriste veten duke u hedhur para një hekurudhe, ajo u dogji veten me benzinë para Ministrisë së Brendshme, në mënyrë që të tërhiqte vëmendjen e qeverisë. Pas kësaj gjithashtu tentoi të fliste me presidentin italian Sergio Mattarella, e cili e injoroi.
Sejdini vite me parë ishte shprehur se në mënyrë që të denonconte tutorët e saj, shteti italian i premtoi mbrojtje, por që kjo gjë nuk ndodhi kurrë.
“Shteti italian, shumë vite më parë, më bindi të denoncoj tutorët, më premtuan mbrojtje. Unë kërkoj një minimum e të drejtave sepse prej shumë vitesh kam luftuar për të ndihmuar të gjitha viktimat e trafikimit, kërkoj të më jepet nënshtetësia italiane” tha ajo.
Kohët e fundit, Adelina Sejdini ishte diagnostikuar me kancer, por pavarësisht gjendjes jo të mirë shëndetësore, nuk i ndali përpjekjet, duke shkuar shpesh në Romë.
E ndjera vendosi t’i japë fund jo vetëm këtyre përpjekjeve, por dhe jetës së saj, duke u hedhur nga një urë hekurudhore.
