Vrasja e sipërmarrësit italian Edoardo Sarchi, 44 vjeç, në fshatin Salari të Tepelenës, ka marrë përmasa gjithnjë e më të errëta, teksa mediat italiane hedhin poshtë versionin zyrtar të autoriteteve shqiptare. “Corriere della Sera”, prestigjiozja italiane, e ka rikthyer ngjarjen në vëmendje duke ngritur dyshime të forta mbi mënyrën se si u zhvilluan hetimet dhe mbi rrethanat e vdekjes së biznesmenit.
Sipas raportimit, Sarchi nuk është vrarë me armë zjarri, por është dhunuar brutalisht me sende të forta, duke u goditur për vdekje në kokë. Në vendin e ngjarjes nuk janë gjetur gëzhoja, çka përjashton pistën e një atentati me armë. Pikëpyetje të tjera janë ngritur edhe mbi dëshmitë kontradiktore të tre anëtarëve të familjes Braçi, të cilët ndodheshin me viktimën në momentin e vrasjes. Fillimisht ata kanë deklaruar se një person i armatosur në këmbë u kishte dalë përpara dhe kishte qëlluar me breshëri, ndërsa një version tjetër flet për një konflikt të çastit mes Sarchit dhe 48-vjeçarit Kamber Sulçaj, i dyshuar si autor i ngjarjes.
“Corriere della Sera” shkon më tej, duke ngritur dyshimin se vetë personat që raportuan vrasjen mund të kenë qenë të përfshirë në ekzekutimin e sipërmarrësit italian. Ky dyshim bazohet në deklaratat e tyre të paqarta dhe mbi faktin se disa prej tyre janë emra të njohur për autoritetet shqiptare për episode të mëparshme dhune.
Një tjetër element që shton misterin është se Sarchit nuk iu krye autopsi, ndërkohë që bashkëshortja e tij shqiptare, Majlinda Taga, organizoi funeralet në mënyrë të menjëhershme dhe private, duke mbyllur çdo mundësi për ekzaminim mjeko-ligjor. Mediat italiane theksojnë se Taga është aksionere në bizneset e Sarchit dhe ka lidhje të ngushta me ortakët e tij, mes të cilëve edhe shtetasi Gazment Braçi.
Sipas “Corriere della Sera”, hetimi në Shqipëri duket i mbyllur, gjë që lidhet edhe me faktin se ortakët e biznesmenit kanë lidhje familjare me një eksponent të fuqishëm politik. Ndërkohë, i vetmi i shpallur në kërkim, 48-vjeçari Kamber Sulçaj, ndodhet ende në arrati, ndërsa pritet që Prokuroria të kërkojë masë sigurie ndaj tij.
Në analizën e saj, media italiane e përshkruan ngjarjen si një vrasje të mbuluar me mister, ku heshtja lokale, funerali i shpejtë dhe mungesa e autopsisë e bëjnë edhe më të dyshimtë këtë rast. Një skenar i errët që, sipas saj, ngre dyshime për përfshirjen e figurave me ndikim në Shqipëri dhe lë në hije të vërtetën e vdekjes së Edoardo Sarchit.
