Një ngjarje e rëndë tronditi Gjermaninë, ku një 33-vjeçar me origjinë nga Kosova, Samson K., dyshohet se ka vrare me thikë bashkëshorten e tij, Sabrina K., 31 vjeç, duke i shkaktuar plagë të rënda trupore.
Sipas mediave gjermane, gruaja është goditur pesë herë me thikë, në prani të djalit të tyre 7-vjeçar.
Gazeta “Bild” raporton se çifti kishte dy fëmijë një djalë dhe një vajzë 4 vjeçare dhe ishin prej vitesh të martuar, megjithatë marrëdhënia e tyre ishte e mbushur me konflikte të vazhdueshme.
Pas sulmit, Samsoni nuk u largua nga vendngjarja, por qëndroi pranë bashkëshortes së plagosur dhe bëri një telefonatë. Një dëshmitar ka fotografuar momentin e arrestimit të tij.
Sipas dosjes gjyqësore, Samson K. kishte precedentë penalë për dhunë në familje. Më 17 janar 2024, ai kishte ushtruar dhunë ndaj bashkëshortes, duke e goditur në fytyrë dhe duke i shkaktuar plagë e mavijosje.
Si rezultat, një vendim gjykate i ndalonte afrimin ndaj saj dhe banesës familjare më shumë se 100 metra. Megjithatë, ai e kishte shkelur këtë urdhër katër herë. Vendimi ishte në fuqi deri më 19 korrik 2024.
Ngjarja ndodhi mëngjesin e së martës, kur Samsoni kishte tentuar të merrte të bijën nga kopshti. Stafi nuk ia dorëzoi fëmijën dhe njoftoi Sabrinën, e cila e mori vajzën dhe më pas shkoi të merrte të birin nga shkolla.
Në momentin kur po kthehej në shtëpi me djalin 7-vjeçar, Samsoni e kishte ndjekur dhe e sulmoi në prag të banesës. Sipas dëshmitarëve, ai përdori një thikë të vogël dhe e goditi Sabrinën disa herë në sy të fëmijës.
Pas sulmit, ai qëndroi aty duke u thënë të pranishmëve: “Nuk e dini çfarë më bëri ajo”. Nuk dihet ende se çfarë nënkuptonte me këtë deklaratë.
Një zyrtare policie është kujdesur për fëmijët e çiftit. Ajo mori për dore vajzën e vogël dhe e çoi në një dhomë me lodra, ndërsa autoritetet kanë nisur hetimet për të zbardhur plotësisht ngjarjen.
