Një ngjarje tronditëse ka ndodhur në një shkollë fillore në qytetin Daejeon, Koreja e Jugut, ku një mësuese rreth të 40-tave ka goditur për vdekje me thikë një vajzë tetëvjeçare.
Sipas autoriteteve, mësuesja ka pranuar autorësinë e sulmit.
Vajza u gjet e plagosur në katin e dytë të ndërtesës së shkollës rreth orës 18:00 të së hënës dhe u shpall e vdekur më vonë në spital.
Pranë saj ndodhej mësuesja, e cila kishte gjithashtu plagë me thikë, për të cilat policia dyshon se mund të jenë vetëshkaktuar.
Presidenti në detyrë i Koresë së Jugut, Choi Sang-mok, ka urdhëruar një hetim të hollësishëm mbi rastin dhe ka kërkuar nga autoritetet të marrin masa për të parandaluar incidente të tilla në të ardhmen.
Sipas zyrës arsimore të Daejeon, mësuesja kishte marrë një leje gjashtëmujore më 9 dhjetor për shkak të depresionit.
Megjithatë, pas vetëm 20 ditësh, ajo u rikthye në detyrë pasi një mjek e vlerësoi si të aftë për punë. Disa ditë para ngjarjes, kolegët e saj kishin raportuar sjellje të dhunshme nga ana e saj.
Koreja e Jugut është një vend i njohur për nivelin e lartë të sigurisë dhe ligjet e rrepta për kontrollin e armëve.
