Një ngjarje e rëndë tronditi qytetin gjerman të Halle (Saale) mesditën e së dielës, kur një 46-vjeçar nga Kosova sulmoi me thikë disa persona përpara një ndërtese banimi në zonën e njohur si Magistrale.
Policia gjermane ka dhënë detaje të reja mbi incidentin, i cili ka shkaktuar alarm në komunitetin lokal.
Sipas autoriteteve, nga sulmi mbetën të plagosur tre persona, mes tyre edhe një vajzë 11-vjeçare.
Një 29-vjeçar ndodhet në gjendje të rëndë, ndërsa një tjetër burrë, 47 vjeç, dhe vajza e mitur kanë marrë plagë më të lehta. Të tre janë dërguar në spital menjëherë pas ngjarjes për trajtim mjekësor.
Paraprakisht dyshohet se gjithçka nisi pas një debati për shkak të zhurmës që po bënin fëmijët në hyrje të banesës.
Sipas dëshmitarëve, sulmuesi doli nga apartamenti dhe goditi me një thikë të gjatë disa nga fëmijët që ndodheshin pranë ndërtesës.
Autori u arrestua brenda pak minutash dhe ndodhet aktualisht në paraburgim. Hetimet janë në vijim për të përcaktuar rrethanat e sakta dhe për të identifikuar mjetin e përdorur në sulm.
Policia ka kryer ekspertiza në vendin e ngjarjes dhe ka vendosur markime për mbledhjen e provave materiale.
Ngjarja ka shkaktuar shqetësim të madh në zonë, veçanërisht për faktin se në shënjestër ishin fëmijë.
Autoritetet gjermane kanë premtuar hetim të thelluar dhe rritje të masave të sigurisë në lagje për të parandaluar incidente të ngjashme.
