Ministri i Mbrojtjes Niko Peleshi ka zbardhur vendimin e marrë në orët e vona të mbrëmjes lidhur me kontrollorët e Rinasit. Në emisionin “7 pa 5” në Vizion Plus Pelshi ka thënë se Komiteti i Mbrojtjes Civile ka ngarkuar ministren e Infrastrukturës dhe Energjisë që të zëevendësojë kontrollorët qoftë me të huaj, qpftë me shqiptarë.
“Dua të bëj me dije për herë të parë në media diçka. Ministri i Mbrojtjes është edhe drejtues i Komitetit të Mbrojtjes Civile dhe kam thirrur në orët e vona një takim të Komitetit të Mbrojtjes Civile. Ky Komitet i përbërë nga disa ministra, ka marrë një vendim me tre pika. Pika e parë ngarkon ministrin e Infrastrukturës dhe Energjisë për marrjen e masave të nevojshme për të bërë të mundur rikthimin e punës, qoftë edhe duke zëvendësuar e kontrollorët, qoftë me të huaj, qoftë me vendas; të përcaktojë kriteret e licencimit për të rinisur fluturimet sa më parë dhe të bëhet çfarë është e nevojshme për rifillimin gradual të punës. Nuk mund të rrimë në vend, nuk mund të ngelemi peng i lojës politike, do të kryej deri në fund detyrën time si ministër, nisur nga rezultati i këtij Komiteti, ministrja Balluku ngarkohet për të bërë gjithçka për të rifilluar punën. Njerëzit kanë shumë pikëpyetje kur do të vijnë, kur do të ikin, priten vaksinat, e kemi vlerësuar si një kërcënim për Mbrojtjen Civile dhe kemi marrë këtë vendim”, ka thënë Peleshi.
Puna në aeroportin e Rinasit ndaloi për shkak të grevës së kontrollorëve, ndërsa Gazeta Reforma ka bërë me dije ditën e djeshme se gjithçka është bërë gati dhe kontrollorë turq do vijnë të zëvendësojnë ata shqiptarë.
