Një 15-vjeçar që u përplas një ditë më parë nga makina, ka ndërruar jetë. Mësohet se i mituri ka ndërruar jetë rreth orës 02:00 në spitalin e Fierit, vetëm pak kohë pasi ishte dërguar për të marrë ndihmën e nevojshme mjekësore pas aksidentit. Rreth orës 22:00, 15-vjeçar ishte duke udhëtuar me biçikletë në aksin rrugor Hamil-Dërmënas, kur një automjet tip “Audi” e aksidentoi. Drejtuesi i makinës, Egzon Berisha është vënë në pranga.
NJOFTIMI I POLICISE
Specialistët e Sektorit të Qarkullimit Rrugor në DVP Fier arrestuan në flagrancë shtetasin E. B., 29 vjeç, banues në Dërmënas, Fier, pasi në datë 23.06.2022, rreth orës 22:00, në aksin rrugor Hamil-Dërmënas, duke drejtuar automjetin tip “Audi”, ka përplasur shtetasin e mitur 15 vjeç, banues në Hamil, i cili po udhëtonte me bicikletë, dhe është larguar nga vendngjarja. Shtetasi i mitur ka ndërruar jetë rreth orës 02:00 në spitalin e Fierit. Materialet i kaluan Prokurorisë, për veprime të mëtejshme procedurale për veprat penale “Shkelja e rregullave të qarkullimit rrugor” dhe “Largim nga vendi i aksidentit”.
Kujtojmë se më shumë persona humbën jetën në aksidente rrugore në vitin 2021 në raport me një vit më parë. Të dhënat e INSTAT tregojnë se aksidentet rezultuan fatalë për 197 persona me një rritje 8.8 për qind. Rritja për vitin e kaluar në raport me 2020 vjen edhe si rezultat se viti i pandemisë ishte atipik dhe vend hyri në karantinë për disa muaj duke minimizuar kështu qarkullimin e mjeteve në rrugë.
Pavarësisht shifrave që ende janë shqetësuese ajo që bie në sy është rënia graduale vit pas viti e numrit të aksidenteve dhe mesatarja disavjeçare mbetet dukshëm më lart se shifrat e sotme. Kështu në vitin 2016 numri i vdekjeve nga aksidentet rrugore ishte 269 apo rreth 37% më lart sesa në vitin 2021.
