Shefja e Infektivit, Najada Çomo e cila është në krye të detyrës në frontin e luftës kundër koronavirusit, u ka bërë thirrje qytetarëve të respektojnë masat për parandalimin e koronavirusit.
Përmes një mesazhi të bërë publik nga ministrja e Shëndetësisë Ogerta Manastirliu, Çomo shprehet se qytetarët duhet të mbajnë maskën, respektojnë distancën si dhe të shmangim grumbullimet.
Me lodhjen që i vërehet te sytë, Çomo shprehet se virusi është midis nesh ndërsa thekson se detyra e gjithsecilit është të mbrojë shëndetin e tij.
“Jemi në sezonin e verës. Kanë kaluar 5 muaj dhe fluksi i pacientëve ka ardhur duke u shtuar. Kam një apel për qytetarët që gjithë këto muaj pune intensive janë një lodhje e jashtëzakonshme.
Ju lutem respektoni masat për mbajtjen e maskës, ruani distancën dhe vizitoni sa më pak vendet me shumë njerëz.
Virusi është midis jush, është edhe midis nesh si personel shëndetësor që iu shërbejmë ne. Ne jemi për t’iu shërbyer juve, ju jeni për të mbrojtur shëndetin tuaj për t’u pakësuar numri i personave që vijnë në spital”, shprehet Çomo.
