Në Itali është shënuar rekord viktimash nga COVID-19, pasi në 24 orët e fundit janë regjistruar 969 vdekje, një numër që nuk ka qenë kurrë kaq i lartë dhe 4, 401 persona janë infektuar.
Autoritetet italiane kanë njoftuar se numri total i viktimave ka shkuar 9, 134, ndërsa 66,414 persona janë prekur që kur vendi u godit nga pandemia.
Shumica e viktimave janë regjistruar në Lombardi, ku 541 viktima raportohen brenda 24 orëve, teksa mes viktimave janë edhe 46 mjekë që kanë humbur jetën.
Kështu, Italia vijon të mbetet e para në rang botëror për numrin e viktimave, teksa SHBA ka numrin më të lartë të të prekurve.
Në 24 orët e fundit në shtetin kinez janë regjistruar 55 të infektuar dhe 5 viktima, ndërkohë numri i përgjithshëm i të infektuarve është 81, 340 persona dhe 3,292 të vdekur.
Po ashtu, dje u lajmërua se nga një studim i kryer në Wuhan ka rezultuar se 14% e personave të shëruar nga COVID-19 janë sërish të infektuar.
Sakaq, në krye të tabelës renditet SHBA që ka numrin më të lartë të personave të prekur në të gjithë botën, plot 86,589 persona dhe 1,321 të vdekur.
Kështu, sikundër kishte paralajmëruar edhe Organizata Botërore e Shëndetësisë epiqendra e re e pandemisë duket se do jenë Shtetet e Bashkuara të Amerikës, ndërsa dje lajmëroi se as në Europë piku i kurbës nuk është shënuar ende.
Në vendin tonë ka shkuar në 186 numri i të prekurve nga COVID-19, teksa gjatë orëve të fundit janë testuar 102 persona, 12 prej të cilëve kanë rezultuar pozitiv, ndërsa në total janë kryer 1,246 teste.
Tek spitali Infektiv janë shtruar 77 persona, 5 prej të cilëve ndodhen në terapi intensive, ndërsa pjesa tjetër ndodhet në pavion dhe paraqesin gjendje të stabilizuar shëndetësore e në total janë 31 të shëruar, mes të cilëve një mjek dhe një infermiere.
Në Kosovë janë prekur 86 persona dhe është shënuar një viktimë, që nga 13 marsi e deri tani.
Deri tani, nuk është krijuar ende vaksina ndonëse përpjekje bëhen çdo ditë, teksa shumë vende po përdoren mjekime alternative që ende nuk janë bërë pjesë e protokollit të OBSH.
E vetmja këshillë për momentin nga autoritetet është zbatimi i 3 masave:
Të qëndruarit në shtëpi.
Larja e duarve dhe higjenda personale.
Distancimi social.
