Prej më shumë se një jave, portali qeveritar e-Albania vijon të ketë probleme serioze në ofrimin e shërbimeve për qytetarët dhe bizneset. Vështirësitë janë shfaqur edhe këtë të diel, duke penguar aksesin në platformë dhe kryerjen e shërbimeve të nevojshme administrative.
Në faqen zyrtare të e-Albania vazhdon të shfaqet i njëjti njoftim, ku thuhet se Drejtoria e Përgjithshme e Gjendjes Civile po kryen operacione mirëmbajtjeje dhe përmirësimi të sistemit elektronik. Sipas njoftimit, gjatë këtyre proceseve mund të ketë ndërprerje të përkohshme apo ngadalësime në marrjen e të dhënave përmes ndërveprimit me Regjistrin Kombëtar të Gjendjes Civile, ndërsa përdoruesve u kërkohet mirëkuptim për vështirësitë e hasura në shërbimet publike online.
Pesë ditë më parë, Aleanca për Profesionistët e Lirë e ngriti publikisht këtë situatë si problem serioz, duke theksuar se bizneset nuk arrijnë të marrin shërbime apo të kryejnë pagesa. Në reagimin e saj, Aleanca kërkon sqarime të mëtejshme nga institucionet përgjegjëse, duke nënvizuar se këto platforma janë tashmë infrastrukturë bazë për regjistrime, deklarime, aplikime, pagesa dhe përmbushje detyrimesh ligjore.
Sipas Aleancës, ndërprerja edhe e përkohshme e sistemeve digjitale krijon pasiguri juridike, vonesa procedurale, rrezik penalitetesh dhe kosto shtesë për bizneset dhe profesionistët e lirë, të cilët varen pothuajse tërësisht nga shërbimet online. Reagimi ngre pikëpyetje mbi qëndrueshmërinë teknike të sistemeve, menaxhimin e riskut, kapacitetet e back up-it, komunikimin institucional dhe mungesën e mekanizmave alternativë në raste të tilla.
Në këtë kontekst, Aleanca kërkon transparencë më të madhe mbi shkaqet dhe kohëzgjatjen e ndërprerjeve, forcimin e sigurisë dhe qëndrueshmërisë së sistemeve digjitale, parashikimin e procedurave alternative dhe shtyrjen automatike të afateve ligjore, si dhe komunikim të qartë dhe në kohë me përdoruesit për të shmangur pasigurinë dhe keqinterpretimet.
Problemet nuk prekin vetëm bizneset. Edhe qytetarët hasin vështirësi në shërbime bazë si regjistrimi i fëmijëve të porsalindur, aplikimet për pajisje me dokumente identifikimi apo rinovimin e pasaportave. Situata bëhet edhe më problematike në këtë periudhë fundviti, kur rikthimi i emigrantëve në atdhe është i lartë dhe shumë prej tyre përpiqen të shfrytëzojnë ditët e pushimit për të kryer dokumentacionet e nevojshme.
