Policia është ende në kërkim të ish-kryebashkiakut të Vorës, Agim Kajmakut.
Ky i fundit akuzohet për shpërdorim detyre, si dhe gjithashtu ka fshehur një dënim në Greqi për falsifikim kartëmonedhash.
Edhe pse ndodhet në arrati, ai ka apeluar masën e sigurisë “Arrest me burg”.
Dyshohet se deri më tani kanë dështuar 13 operacione për arrestimin e tij, shkruan “Faxweb”.
Mësohet se SHÇBA ka nisur një hetim, për disa punonjës në polici, që dyshohet se kanë dekonspiruar operacionet.
Ndërkohë dy ditë më parë, iu sekuestrua telefoni nënkryetarit të Bashkisë së Vorës, Gentian Picarit.
Sipas lajmeve që qarkulluan në media, Bashkia e Vorës u shndërrua në një arenë përplasje mes Kajmakut dhe ministres së Infrastrukturës, Belinda Balluku.
Kjo e fundit kërkoi që të vendoste në krye të bashkisë, Laureta Omerin.
Mirëpo Kajmaku nuk ndenji duarkryq dhe shkarkoi Omerin dhe nënkryetarin tjetër, në ditën kur KQZ i hoqi mandatin.
