Në qarkun e Elbasanit dyshohet për një tjetër viktimë nga vala shkatërruese e zjarreve që ka përfshirë vendin.
Pas vdekjes së 80-vjeçarit një ditë më parë, i cili kishte ndezur zjarr në oborrin e shtëpisë duke shkaktuar përhapjen e flakëve, autoritetet dyshojnë se një person tjetër ka humbur jetën nga asfiksia e rëndë e shkaktuar nga tymi.
Flakët kanë shkaktuar dëme të mëdha edhe në infrastrukturë dhe banesa. Disa persona kanë përfunduar të asfiksuar, ndërsa dhjetëra shtëpi janë djegur plotësisht.
Fshatrat Kullollas, Bletëz, Skënderbegas, Menkollare, Zenelas dhe Harunas janë përfshirë nga zjarret, duke u shkatërruar tërësisht.
Bilanci zyrtar i mbrëmjes së djeshme flet për 34 vatra zjarri në të gjithë vendin, prej të cilave 27 ende aktive dhe 7 nën monitorim. Situata më alarmante mbetet në jug, ku rrezikohen zonat e mbrojtura, shtëpitë e banorëve dhe rrjetet e infrastrukturës.
