Ka shkuar në dy numri i viktimave nga aksidenti i rëndë që ndodhi mbrëmjen e së hënës në fshatin Golaj të Hasit, ku dy automjete tip “Benz” u përplasën mes tyre. Ngjarja ndodhi rreth orës 19:50, në aksin rrugor Krumë–Golaj.
Sipas të dhënave zyrtare, njëri prej viktimave ishte shtetas me pasaportë britanike, ndërsa tjetri rezulton të ketë qenë invalid pune. Në automjetin e drejtuar nga shtetasi N. L. u përplas me mjetin që drejtohej nga N. S., ku ndodhej edhe pasagjeri Z. N.
Përveç dy të vdekurve, një tjetër person mbeti i plagosur dhe po trajtohet në spital, ndërsa gjendja e tij shëndetësore nuk është bërë ende publike.
Dyshohet se shpejtësia gjatë drejtimit të mjetit ka qenë një nga shkaqet e aksidentit, por autoritetet ende nuk kanë përcaktuar se cili nga drejtuesit ka qenë përgjegjës për përplasjen fatale. Grupi hetimor vazhdon punën për zbardhjen e plotë të rrethanave të kësaj ngjarjeje tragjike.
